Galicia consolídase entre as comunidades menos endebedadas logo de baixar a súa débeda 226 millóns no terceiro trimestre
- A Xunta diminúe seis décimas a ratio de débeda/PIB de Galicia, ata o 18,6%
- O endebedamento galego leva tres anos totalmente estabilizado
- Galicia é a comunidade líder no control da débeda desde o ano 2009
Santiago de Compostela, 15 de decembro de 2017.- A Xunta de Galicia reduciu a súa débeda pública 226 millóns de euros no terceiro trimestre do ano e consolídase entre as comunidades autónomas con menor endebedamento de toda España, ao pechar o trimestre como a quinta comunidade con menor ratio de débeda/PIB, segundo os últimos datos estatísticos publicados hoxe polo Banco de España.
Ao peche do terceiro trimestre do ano, a ratio de débeda/PIB de Galicia baixou seis décimas respecto ao trimestre anterior ata situarse no 18,6%. Ademais, a media autonómica baixou menos no mesmo período -catro décimas- e situouse no 24,7%. Isto supón que o diferencial positivo de Galicia respecto á media autonómica segue medrando e xa é de máis de seis puntos, cando en 2008 este indicador estaba igualado á media.
En volume absoluto, a débeda pública das comunidades autónomas situouse ao peche do terceiro trimestre en 284.407 millóns de euros, o 3,91% deste importe -11.137 millóns- na comunidade galega.
Os datos oficiais do Banco de España ratifican que a débeda da Administración galega está totalmente estabilizada dende finais do exercicio 2014, e a previsión da Xunta é que Galicia remate o ano 2017 sen incrementar o seu endebedamento.
Líder en control da débeda dende 2009
Galicia é a comunidade autónoma de referencia no control da débeda pública dende o ano 2009, tal como mostran os datos do organismo supervisor. No período 2009-2016 Galicia foi a comunidade que menos aumentou o seu volume de débeda, cun ritmo de incremento anual do 17,6%, mentres que na media autonómica este indicador situouse no 28,5% e nalgunhas comunidades superou o 40% anual.
O control da débeda pública é unha das bases do modelo de crecemento san que defende a Xunta de Galicia, e é froito da progresiva redución do déficit que vén acadando o Goberno galego nos últimos anos. Este mellor comportamento respecto da media autonómica permitiu a Galicia evitar a emisión duns 3.600 millóns de euros de débeda pública, cun aforro anual en xuros da débeda duns 85 millóns.
DÉBEDA POR CC.AA *CCAA de réxime foral | Ratio de débeda/PIB (%) |
País Vasco* | 14,6 |
Madrid | 14,9 |
Canarias | 16,6 |
A Rioxa | 18,4 |
GALICIA | 18,6 |
Asturias | 18,8 |
Navarra* | 19,0 |
Castela e León | 20,4 |
Aragón | 21,6 |
Andalucía | 21,9 |
Cantabria | 23,1 |
Estremadura | 23,3 |
TOTAL CCAA | 24,7 |
Murcia | 29,2 |
Baleares | 30,8 |
Cataluña | 35,1 |
Castela-A Mancha | 36,4 |
Valencia | 40,9 |