A Xunta de Galicia propón aos sindicatos incluír na oferta de emprego público para 2019 máis de 1.500 prazas de acceso libre
- Esta oferta de 1.543 prazas garantirá que se continúan abrindo importantes oportunidades de emprego na Administración galega
- O maior número de prazas concéntrase nas categorías de auxiliar coidador (323), limpador-fregador (181), camareiro-limpador (151), no corpo auxiliar (127), na agrupación de subalternos (112) e na categoría de oficial 2ª cociña (97 prazas)
- A maiores, outras 263 prazas resérvanse para a promoción interna do persoal funcionario, o que lles garante o seu dereito ao progreso profesional
- As 847 prazas restantes serán para desenvolver o proceso voluntario de funcionarización do persoal laboral fixo
Santiago de Compostela, 22 de marzo de 2019.- A Xunta de Galicia vén de propoñer hoxe ás organizacións sindicais a aprobación dunha oferta de emprego público (OEP) no eido da Administración Xeral cun total de 1.543 prazas de acceso libre, o que segue abrindo importantes oportunidades de emprego na Administración autonómica. A esta cifra súmanse outras 263 prazas para a promoción interna do persoal funcionario, e tamén se engaden outros 847 postos ao proceso de funcionarización pactado no Acordo de concertación do emprego público, asinado este ano cos sindicatos CC.OO. e UGT.
Tal e como recolle a proposta trasladada ás organizacións sindicais, o maior número de prazas de acceso libre concéntrase nas categorías de auxiliar coidador (323), limpador-fregador (181), camareiro-limpador (151), no corpo auxiliar (127), na agrupación de persoal subalterno (112) e na categoría de oficial 2ª cociña, con 97 prazas. A todas estas prazas poderá acceder calquera persoa que cumpra os requisitos esixidos nas correspondentes convocatorias, e as probas desenvolveranse a través do sistema de concurso-oposición.
Ademais, a proposta de decreto inclúe 263 prazas reservadas para a promoción interna do persoal funcionario. A estas prazas só poderán acceder aqueles empregados públicos que xa teñen unha praza fixa na Administración e que queren opositar para acadar un ascenso. As probas tamén se desenvolverán a través do sistema de concurso-oposición e, obviamente, son de carácter competitivo, se ben no propio Acordo de concertación do emprego público Xunta e sindicatos pactaron medidas que favorecen esta promoción.
Finalmente, amplíase a outros 847 postos o proceso voluntario de funcionarización do persoal laboral fixo, o primeiro de carácter global que desenvolve a Administración galega na súa historia. A diferenza da promoción interna, estas probas non teñen carácter competitivo, senón que permitirán modificar o réxime xurídico do traballador, que pasará de ser empregado laboral fixo a funcionario da Administración.
(INCLÚESE ANEXO COAS PRAZAS PROPOSTAS AOS SINDICATOS)
1. ACCESO LIBRE (1.543 PRAZAS)
| Auxiliar coidador (IV) | 323 |
| Limpador – Fregador (V) | 181 |
| Camareiro – Limpador (V) | 151 |
| Corpo auxiliar (C2) | 127 |
| Persoal Subalterno | 112 |
| Oficial 2ª Cociña (IV) | 97 |
| Escala Axentes técnicos facultativos servizos sociais (B) | 74 |
| Corpo administrativo (C1) | 60 |
| Corpo superior (A1) | 59 |
| Escala de enxeñeiros técnicos (A2) | 43 |
| Oficial 1ª condutor (III) | 38 |
| Outras escalas (A1) | 37 |
| Outras categorías (IV) | 37 |
| Corpo de xestión (A2) | 33 |
| Outras escalas (A2) | 32 |
| Intérprete linguaxe de signos (III) | 31 |
| Outras categorías (III) | 31 |
| Escala Auxiliares de Clínica (C2) | 30 |
| Escalas técnica de finanzas e de inspectores de consumo (A2) | 18 |
| Escala de enxeñeiros (A1) | 12 |
| Escalas de letrados e superior de Finanzas (A1) | 12 |
| Escala de Axentes de Inspección – espec. Consumo (C1) | 3 |
| Bombeiro forestal-condutor e Emisorista (C2) | 2 |
2. PROMOCIÓN INTERNA (263 PRAZAS)
| Administración Xeral | 225 |
| Administración Especial | 38 |
3. FUNCIONARIZACIÓN PERSOAL LABORAL FIXO (847 PRAZAS)
| Administración Xeral | 11 |
| Administración Especial | 836 |