O Banco de España confirma que en 2018 Galicia seguiu a reducir o seu endebedamento
- É o segundo ano consecutivo no que baixa a ratio de débeda/PIB de Galicia
- Este indicador descendeu ata o 18,0% no peche do exercicio, fronte ao 24,3% de media autonómica
- Estes datos ratifican que Galicia volveu cumprir o límite de débeda fixado polo Ministerio de Facenda, que era do 18,4%
- Galicia mantense como a 3ª comunidade de réxime común con menor ratio
- Galicia ten 3.970 millóns de euros menos de débeda que a media autonómica
Santiago de Compostela, 29 de marzo de 2019.- O Banco de España vén de confirmar que en 2018 Galicia logrou baixar o seu endebedamento público por segundo ano consecutivo, ao situar a ratio de débeda/PIB no 18,0% ao peche do cuarto trimestre do ano, 6,3 puntos por debaixo da media autonómica.
Deste xeito, Galicia remata o exercicio 2018 como a terceira comunidade autónoma con menor ratio de débeda de toda España –a quinta incluíndo as de réxime foral-, só por detrás de Madrid e Canarias.
Ao finalizar o cuarto trimestre do ano, a ratio de débeda/PIB de Galicia situouse catro décimas por debaixo da rexistrada no mesmo período do ano anterior (18,4%) e tres décimas por debaixo da rexistrada no terceiro trimestre. Ademais, o diferencial positivo de Galicia respecto á media autonómica (24,3%) mantense en 6,3 puntos, cando en 2008 estaba igualado á media.
Os datos do Banco de España ratifican tamén que Galicia volveu cumprir o obxectivo máximo autorizado para 2018, que era do 18,4%, cumprindo de novo o límite de débeda fixado polo Consello de Política Fiscal e Financeira. Ademais, as cifras do organismo supervisor mostran que a débeda estabilizouse en 2014 e, desde 2016, iniciouse unha senda de redución progresiva do endebedamento que continuará nos vindeiros anos.
En volume absoluto, a débeda das comunidades autónomas situouse ao peche do exercicio en 293.128 millóns, o 3,9% deste importe -11.342 millóns- na comunidade galega. De ter rexistrado o mesmo comportamento que a media autonómica, Galicia tería rematado o ano 2018 con 3.970 millóns de euros máis de débeda pública.
RATIO DE DÉBEDA/PIB POR COMUNIDADES AUTÓNOMAS
*CCAA de réxime foral
| 4ºT |
País Vasco* | 13,5 |
Madrid | 14,6 |
Canarias | 14,8 |
Navarra* | 16,7 |
GALICIA | 18,0 |
Asturias | 18,5 |
A Rioxa | 18,8 |
Castela e León | 20,9 |
Andalucía | 22,0 |
Aragón | 22,0 |
Cantabria | 23,3 |
Estremadura | 24,0 |
TOTAL CCAA | 24,3 |
Baleares | 28,0 |
Murcia | 29,3 |
Cataluña | 34,0 |
Castela-A Mancha | 35,4 |
Valencia | 41,7 |