A Xunta inicia mañá domingo o horario de verán para os seus traballadores, que terá continuidade ata o 15 de setembro

• Como novidade, os empregados públicos con redución de xornada tamén se beneficiarán do horario estival

Santiago de Compostela, 15 de xuño de 2019.- A Xunta de Galicia inicia mañá domingo o horario de verán para os seus traballadores, que terá continuidade ata o próximo 15 de setembro. Esta medida tómase cada ano co obxectivo de facilitar a conciliación da vida familiar e laboral dos empregados públicos da Administración galega.

Como novidade, este ano poderanse beneficiar do horario estival todos aqueles empregados públicos que teñen redución de xornada de traballo diaria. Ademais, os traballadores acollidos ao réxime de flexibilidade automática ou de flexibilidade por conciliación tamén se benefician deste horario, como xa sucedeu o ano pasado.

Entre o 16 de xuño e o 15 de setembro, ambas datas inclusive, os traballadores da Administración Xeral da Xunta deberán realizar seis horas diarias continuadas de traballo entre as oito de mañá e as tres da tarde, fronte ás sete horas e media que establece o horario oficial. O cálculo do cumprimento da xornada laboral será en cómputo diario.