Volver ao contido

Notas de prensa

A conselleira de Facenda di que Galicia manterá en 2015 a mesma folla de ruta que lle permitiu ter mellor comportamento que España durante toda a crise

A conselleira de Facenda di que Galicia manterá en 2015 a mesma folla de ruta que lle permitiu ter mellor comportamento que España durante toda a crise

 

  • Elena Muñoz Fonteriz participou hoxe na presentación do informe BBVA Research
  • Explicou que Galicia seguirá apostando pola control do déficit público, como xa fixo en anos anteriores
  • Indicou que os Orzamentos da Xunta para 2015 introducen os investimentos produtivos, o fomento do emprego, a competitividade das empresas e a economía do coñecemento como "bases imprescindibles" para impulsar o crecemento
  • A conselleira sinalou que Galicia pechará 2014 co primeiro exercicio en positivo dende hai catro anos, e que en 2015 se prevé un crecemento do PIB do 2%

 

A Coruña, 21 de outubro de 2014.- A conselleira de Facenda, Elena Muñoz Fonteriz, resaltou hoxe que Galicia manterá en 2015 "a mesma folla de ruta" que lle permitiu á Comunidade autónoma rexistrar mellor comportamento que a media española durante todos os anos da crise.

 

Na súa intervención durante a presentación hoxe en A Coruña do informe BBVA Research, a titular de Facenda recordou que no período entre 2009 e 2013 Galicia rexistrou unha mellor evolución do PIB autonómico. Ese mellor comportamento produciuse en todos e cada un dos últimos cinco anos, o que indica que non todas as comunidades teñen sufrido a crise coa mesma intensidade.

 

Neste sentido, a conselleira incidiu en que Galicia seguirá apostando pola consolidación fiscal, do mesmo xeito que xa fixo nos anos anteriores. Así, Galicia reducirá en 2015 o déficit público do 1% ao 0,7%, baixando o recurso ao endebedamento nun 30%. Ademais, recordou que a Comunidade galega foi a segunda autonomía con menor incremento do endebedamento durante a crise.

 

A titular de Facenda tamén se referiu á "aposta decidida" do Goberno galego polos investimentos produtivos, o fomento do emprego –con especial referencia á loita contra o desemprego xuvenil-, a competitividade das empresas e a economía do coñecemento. Segundo indicou, son "bases imprescindibles" para avanzar cara un crecemento sostible coa vista posta na Galicia de 2020. Precisamente, esta aposta está xa recollida nos Orzamentos da Xunta para 2015.

 

Elena Muñoz Fonteriz tamén destacou que neste ano a economía galega rexistrará un crecemento do 0,9%, de forma que 2014 será o primeiro exercicio con taxa positiva dende hai catro anos. En canto a 2015, a Xunta prevé un incremento do PIB do 2%, cunha consolidación do crecemento económico que permitirá crear emprego neto por primeira vez dende o inicio da crise.