A Consellería de Facenda pon á súa disposición os seguintes medios para que poida exercer o seu dereito a ser informado dos valores dos bens inmobles que vaian ser obxecto de adquisición ou transmisión, conforme ao artigo 34, letra n), da Lei 58/2003, do 17 de decembro, Xeral Tributaria, cos efectos vinculante previstos no artigo 90 do mesmo corpo legal e no apartado un do artigo 26 do Decreto Lexislativo 1/2011, do 28 de xullo, polo que se aproba o texto refundido das disposicións legais da Comunidade Autónoma de Galicia en materia de tributos cedidos polo Estado.

Sistema para determinar o valor de determinados bens inmobles para a presentación dos impostos sobre sucesións e doazóns e sobre transmisións patrimoniais e actos xurídicos documentados.

Para obter información con carácter previo á adquisición ou transmisión de bens inmobles, establécense dous sistemas:

1. Sistema presencial: para os bens inmobles que non son obxecto do sistema Web anterior. Nestes casos solicitarase unha valoración previa ante os servizos de valoracións das xefaturas territoriais da Consellería de Facenda ou Oficinas Liquidadoras de Distrito Hipotecario. Para iso cubriranse os impresos correspondentes que se encontran nas propias Xefaturas Territoriais e na páxina Web da Consellería de Facenda.
2. Sistema Web: para pisos, garaxes, rochos, locais comerciais, oficinas, naves industriais, casas, chales e terreos rústicos, poderase obter a valoración na Oficina Virtual Tributaria da Consellería de Facenda na súa modalidade de servizos de acceso libre (non necesita certificado de usuario), apartado "declaración de tributos".

As valoracións previas solicitadas por calquera destes sistemas terán efectos vinculantes durante un prazo de tres meses, contados dende a notificación ao interesado, sempre que a solicitude se formulase con carácter previo á finalización do prazo para presentar a correspondente autoliquidación ou declaración e se proporcionasen datos verdadeiros e suficientes á Administración tributaria. Para estes efectos presentarase acompañando á autoliquidación, o informe emitido polos servizos de valoracións (sistema presencial), ou o documento xerado pola Oficina Virtual (sistema Web) dentro do período de presentación do imposto para o cal se solicitou a valoración previa.